Pósadh Éigeantais Thar Lear

Mura dtoilíonn páirtí amháin nó an dá pháirtí leis an bpósadh, nó mura féidir le páirtí amháin nó an dá pháirtí toiliú leis an bpósadh (e.g. i gcás mionaoiseach), pósadh éigeantais is ea é.

I bpósadh éigeantais, féadfaidh teaghlach, cairde agus daoine den phobal leas a bhaint as brú mothúchánach, bagairtí nó foréigean chun tabhairt ar dhuine pósadh. I gcorrchás, tógtar daoine thar lear in aghaidh a dtola chun pósadh.

B’fhéidir go n-inseofaí do dhuine corruair go bhfuil sé/sí ag dul ar thuras chuig a d(h)aoine muinteartha, ach gurb é pósadh atá i ndán dó/di ansin i ngan fhios dó/di. Nuair a bhaineann sé/sí an tír iasachta amach, b’fhéidir go dtógfaí a p(h)as agus a c(h)uid airgid uaidh/uaithi, agus b’fhéidir go mbeifí ag faire air/uirthi i gcónaí lena chinntiú nach bhfillfidh sé/sí ar Éirinn. B’fhéidir go gcrosfaí air/uirthi cumarsáid a dhéanamh le daoine eile freisin.

Tá sé ina chion in Éirinn tabhairt ar dhuine pósadh, nó duine a thabhairt thar lear d’fhonn tabhairt air/uirthi pósadh.

Má shíleann tú gur tógadh thar lear thú i gcomhair pósadh éigeantais, téigh i dteagmháil le do Chonsalacht nó Ambasáid Éireannach áitiúil. 

Má tá faitíos ort go mb’fhéidir gur tógadh cara nó gaol leat thar lear le haghaidh pósadh éigeantais, téigh i dteagmháil le stáisiún áitiúil an Gharda Síochána agus cuir glaoch orainne san Aonad um Chabhair Chonsalachta ar +353 1 408 2527.